माळशिरस लाईव्ह – माळशिरस तालुक्यात चोऱ्यांचे प्रमाण वाढले असून आता चोरांनी थेट देवाच्या मंदिरांनाही लक्ष्य करण्यास सुरुवात केली आहे. माळशिरस तालुक्यातील गारवाड येथील डोंगररावरील प्रसिद्ध ‘सुळकी तुकाई मंदिराचे’ कुलूप तोडून अज्ञात चोरांनी चांदीचे मुकुट चोरून नेल्याची धक्कादायक घटना उघडकीस आली आहे. या घटनेमुळे परिसरात एकच खळबळ उडाली असून भाविकांमधून तीव्र संताप व्यक्त होत आहे.
१९ हजारांचे ३ चांदीचे मुकुट लंपास
मिळालेल्या माहितीनुसार, नामदेव बोधला मगर (वय ७२, रा. गारवाड) यांनी या प्रकरणी माळशिरस पोलीस ठाण्यात फिर्याद दिली आहे. ही चोरी ९ जुलै ते १० जुलै २०२६ रोजी दरम्यान झाली.चोरांनी मंदिराचे कुलूप तोडून आत प्रवेश केला आणि मंदिरातील एकूण १९,००० रुपये किमतीचे तीन चांदीचे मुकुट चोरून नेले.५० ग्रॅम वजनाचा मुकुट (किंमत ₹१०,०००) ३० ग्रॅम वजनाचा मुकुट (किंमत ₹६,०००),१५ ग्रॅम वजनाचा मुकुट (किंमत ₹३,०००) या घटनेची गांभीर्याने दखल घेत माळशिरस पोलीस ठाण्यात अज्ञात चोरांविरुद्ध भारतीय न्याय संहिता (BNS) २०२३ च्या कलम ३३१(४) नुसार गुन्हा दाखल करण्यात आला आहे.या प्रकरणाचा पुढील तपास पोलीस उपनिरीक्षक पवार यांच्या मार्गदर्शनाखाली सहाय्यक पोलीस उपनिरीक्षक (सपोनि) पवार करत आहेत. मंदिरासारख्या पवित्र ठिकाणी झालेल्या या चोरीमुळे गारवाड आणि माळशिरस परिसरातील नागरिकांमध्ये कमालीची नाराजी आणि संतापाचे वातावरण आहे. चोरांचा लवकरात लवकर छडा लावावा, अशी मागणी नागरिकांकडून केली जात आहे.
